Lapidaryo

NANANAGINIP NG GISING Tula ni Maya Abu Al-Hayyat Isinalin sa Ingles ni Fady Joudah (Malayang salin ni Gregorio V. Bituin Jr.) Susulatin ko ang tungkol sa kasiyahan nang sinakop ang Jenin mula sa anim na dako, tungkol sa mga batang tumatakbo habang  tangan ang mga lobo sa Kampo ng Am'ari, tungkol sa kabuuang nagpapatahimik sa mga pinadededeng sanggol ng buong gabi sa Askar, tungkol sa isang munting dagat na maaari nating lakarin panhik-panaog sa Tulkarem, tungkol sa mga matang nakatitig sa mukha  ng mga tao sa Balata, tungkol sa isang babaeng umiindak para sa mga nakahanay sa tsekpoynt sa Qalandia, tungkol sa mga hinabi sa gilid ng  mga lalaking nagtatawanan sa Azzoun, tungkol sa iyo at sa akin na pinupuno natin ng mga sigay at kabaliwan ang ating bulsa at pagtatatag ng lungsod. - sa Jerusalem 10.14.2024 Pinaghalawan ng tula at larawan mula sa kawing na:  https://thebaffler.com/from-palestine/daydream-al-hayyat   Proyektong pagsasalin na balak ilunsad bilang aklat sa Nobyembre 29, 2

NAALIMPUNGATAN madaling araw na naman sa tulog ay kasarapan ngunit naalimpungatan biglang bangon sa higaan isulat ang nasa isip iyon ang agad nalirip anong nasa panaginip? ah, ako'y muling iidlip sa banig nakabaluktot pagkat kay-ikli ng kumot tila balisa't malungkot ako ba'y binabangungot? napatingin sa kisame ano kaya ang mensahe? - gregoriovbituinjr. 10.14.2024

PINAGHALONG BAWANG AT SIBUYAS JUICE pinakuluan ko ang bawang at sibuyas at iniinom ito na animo'y gatas dagdag ito sa arsenal na pampalakas habang naghahanap ng puno ng bayabas na tingin ko'y bihira na sa mga lungsod baka sa lalawigan pag ito'y sinuyod bitamina D at D2  ang nasa't lugod malusog na katawan ang tinataguyod kung walang bayabas, sibuyas muna't bawang gayatin, ilagay sa baso at bantuan ng mainit na tubig o pakukuluan saka inumin pag iyon na'y maligamgam BAwang  at  SIbuyas , tawagin nating  BASI habang ginagawa iyon ay nagmumuni dahil tiyak kong inuming ito'y may silbi nang katawa'y lumakas sa araw at gabi - gregoriovbituinjr. 10.13.2024

HINDI BULAG Tula ni Taghrid Abdelal Isinalin sa Ingles ni Fady Joudah (Malayang salin ni Gregorio V. Bituin Jr.) Hindi, hindi gayon. Ngunit tinangay ng pag-ibig ang isa kong mata upang angkinin, may pangitain ang pag-ibig bago magsilang,  na kinausap ako hinggil sa katumpakan ng kung anong nagaganap sa mga salamin. At pagkatapos ay nabulag ito - dahan-dahan kaming binabad mula sa likod ng isang belo, at hindi namin ito makita. Isang nakabibinging hangin ang nagbulong sa akin na ang mga hangganan ay naniniwalang  ang espasyo'y mas maliit kaysa daigdig mula nang iginuhit ng mga paslit  ang globong mas maliit kaysa kanilang tahanan at mga matang mas malaki kaysa kanilang mukha. Dito'y bigong mahanap ng pag-ibig ang mga mata nito, hiniram ang labi ko para sa mas mabuting anyo. Pag-ibig, bakit hindi ka manatili kung ano ka, nang walang opisyal na titulo, at nabubuhay para sa sinumang may hangad sa iyo sa loob ng limang minuto bago ka magpatiwakal? Napakalupit mong ipinahayag ang iyo

ULO NG TILAPYA KAY ALAGA ang natirang ulo ng tilapya ang pasalubong ko kay alaga batid kong ang hilig niya'y isda kaya ito'y aking inihanda bantay siya sa bahay na ito pag kami'y naroon sa trabaho lalo't wala naman kaming aso mga daga'y nawalang totoo pag dumating kami'y sasalubong si alaga kung anong mayroon buti pag may natira kaming baon na siya namang kakain niyon salamat, alaga, nariyan ka sa tahanan ay laging kasama ngunit pag wala namang natira sa pagkain, hingi ko'y pasensya - gregoriovbituinjr. 10.13.2024 * mapapanood ang bidyo sa kawing na:  https://fb.watch/vb8eH9Ltmi/  

MGA NATANGGAP NA ECOBAG SA NADALUHANG PAGTITIPON Maikling sanaysay at tula ni Gregorio V. Bituin Jr. Sa loob lang ng wala pang isang buwan ay nakatanggap na ako ng tatlong ecobag mula sa tatlong pagtitipon. Nakakatuwa at mayroon silang pabaon sa mga nagsidalo. Maganda ang ganito lalo na't madaling mapansin ng sinuman ang mga nakatatak na sadyang mapagmulat. Natanggap ko ang isa bilang representante ng aming organisasyon sa  13th National Congress ng Philippine Alliance of Human Rights Advocates (PAHRA)  noong Setyembre 17-18, 2024. Bawat dumalo ay mayroon din nito. Ang nakatatak sa ecobag ay  "Uphold, assert & defend! all human rights for all!"  at  "52 Years Later: Remembering Martial Law and Upholding the Rule of Law" , na may logo ng PAHRA at The May 18 Foundation. Ang isa pa sa natanggap ko ay ang maliit na ecobag na nakasulat ay  "Say No to Plastic"  na ginawa kong lagayan ng charger ng laptop at selpon. Ito'y mula naman sa  General Assemb

MGA ISPESIPIKONG DETALYE Tula ni Hosam Maarouf Isinalin sa Ingles ni Fady Joudah (Malayang salin ni Gregorio V. Bituin Jr.) Nalulunod sa oras na inilaan para sa tigil-putukan, lumilikha kami ng mga reserbang puso kung sakaling mawala ang puso ng bawat isa sa amin. Hindi namin natitiyak ang halaga ng buhay sa madulas na dalisdis, gayunpaman, ang pag-asa'y tila hindi mabubura nang agaran. Ang bawat sandaling detalye ng digmaan, nakalalasong gas na hindi natin mapipigilang dumilig sa ating mga dugo, hindi man lang maabot ang lagim upang iitsa itong buo sa labas ng aming mga kalamnan. Mahal na Bathala, lumalakas ang pintig ng pagkabalisa sa loob namin kaysa naririyang bomba, ngunit turan mo kung paano mo hihikayatin ang sangkatauhan na ang kagubatan ay walang tambol? Maraming ispesipikong detalye ang nagpapako sa ating mga paa sa lupa habang tumatakbo nang tumatakbo ang tahanang iniiwan ang mga bato nito (mga anak nito) sa likuran: mga bahagi ng katawan, mga retaso ng alaala. — sa Gaza

LIMANG ULAT NG NAGPATIWAKAL SA LOOB NG 18 ARAW Maikling sanaysay at tula ni Gregorio V. Bituin Jr. Sa pahayagang Bulgar na madalas kong binibili, napansin kong marami ang nagpapatiwakal. Akala ko, nabasa ko na o naulit lang ang ulat, kaya hinanap ko. Hanggang matipon ko ang limang ulat. Sa loob ng labingwalong araw, may limang nagpakamatay. Hindi ako sikolohista o psychologist, subalit ang isyung ito'y nakababahala. Noong kabataan ko, dumating din ako sa puntong nais kong magpatiwakal dahil sa kabiguan sa pag-ibig. Subalit dahil sa aktibismo, tumibay ang loob ko't paninindigan. Tinipon ko ang limang balitang nabasa ko mula sa pahayagang Bulgar, mula Setyembre 20 hanggang Oktubre 7, 2024, o labingwalong araw. (Set.30 - Set.19 ay 11 araw, kasama ang Setyembre 20 sa bilang, kaya hindi Set.30-Set.20, plus 7 araw ng Oktubre.) Wala pang tatlong linggo.  Batay sa mga ulat sa pahayagan, sila'y nagpatiwakal, maliban kung maimbestigahang may foul play. Dalawa sa balita ay magkasama s

PROYEKTONG SALIN NG TULANG PALESTIN pinoproyekto ko ngayon ang pagsasalin ng samutsaring tula hinggil sa Palestin mga tula ng kanilang mga makata ay sinalin upang madaling maunawa sa wika natin ang pakikibaka nila lalo't gawa sa kanila'y dyenosidyo na timba-timbang dugo't luha na ang bumalong buhay na pinagwalay, sinong magdudugtong mga makatang ito'y anong naiisip upang mga kababayan nila'y masagip pagsasalin ng tula nila'y aking mithi nang sa laban nila'y mag-ambag kahit munti ang petsang  Dalawampu't Siyam ng Nobyembre ay International Day of Solidarity with the Palestinian People,  ang aking hangad aklat ng salin ng tula nila'y ilunsad - gregoriovbituinjr. 10.12.2024 * ang proyektong pagsasalin ay balak ilunsad ng makata bilang aklat sa Nobyembre 29, 2024, International Day of Solidarity with the Palestinian People * litratong kuha sa ikatlong araw ng seminar ng grupong IDefend, 10.11.2024, habang tangan ng makata ang isang watawat ng Palestin

PANINIWALA Tula ni Taghrid Abdelal Isinalin sa Ingles ni Fady Joudah (Malayang salin ni Gregorio V. Bituin Jr.) Hindi iyon ang pangunahin, subalit sa tuwing binubura ko iyon nakakalimutan ko ang aking mga kamay sa rabaw ng mga bagay na ang pananampalataya'y napipilitang muling lumitaw sa aking mga kamao. Ibang tipo ka ng paniniwala. Na maaaring mangibabaw iyon sa presensya ng biktima bago ako o abutin mo ang berdugo sa aking puso. Ang bawat kaso ng Monalisa'y pinakikitunguhan ng may ngiti. Hindi siya nabigo sa kanyang paghahanap. Ang pagsubok sa kanyang pagkasawi ay gumulang na sa paniniwala sa kanyang pag-iral. 10.11.2024 Pinaghalawan ng tula at larawan mula sa kawing na:  https://thebaffler.com/from-palestine/belief-abdelal   Proyektong pagsasalin na balak ilunsad bilang aklat sa Nobyembre 29, 2024, International Day of Solidarity with the Palestinian People 

MADALING ARAW madaling araw ako'y nagising mula sa malapot kong paghimbing nang madinig kong may naglalambing nauulanan pala si muning para bang kumakatok sa pinto kaya bumangon ako't tumayo sa kisame pa'y may tumutulo madilim pa't buwan ay naglaho siya'y pinapasok ko na lamang upang tumigil na ang ngiyawan siya'y nakatulog sa basahan at ako'y muling umidlip naman ramdam ko pa rin ang managinip o baka lang ako'y nag-iisip sa araw na ito'y may nasagip kaya may saya akong umidlip - gregoriovbituinjr. 10.11.2024

DALAWA PANG AKLAT PAMPANITIKAN NGAYONG OKTUBRE Maikling sanaysay at tula ni Gregorio V. Bituin Jr. Matapos ang ikalawang araw ng seminar, na bahagi ng limang araw na aktibidad na inilunsad ng isang grupo sa karapatang pantao, nakabili ang inyong lingkod ng dalawang aklat sa Popular Book Store sa Lungsod Quezon. Maaga kaming nakatapos kanina kaya nakahabol pa ako bago magsara ng ikalima ng hapon ang Popular Book Store. Nilakad ko lang mula sa pinagdausan ng seminar. Inaamin ko, mahilig akong mangolekta at magbasa ng mga aklat-pampanitikan kaya laking tuwa ko nang makita ko ang mga librong iyon. Nabili ko ang nobelang  "Barikada" ni Edberto M. Villegas , at  "Ang Bulkan at Iba Pang Kuwento" ni Bienvenido A. Ramo s. At kumuha na rin ng ilang magkakaibang isyu ng pahayagang Pinoy Weekly dahil libre lang ito. Mabuti nang may nababasang isyu ng masa na hindi basta nakikita sa mga pang-araw-araw na pahayagan. Ang aklat na "Barikada", na nabili ko ng P100, ay may

BUKANGLIWAYWAY Tula ni Rawan Hussin Isinalin sa Ingles ni Fady Joudah (Malayang salin ni Gregorio V. Bituin Jr.) Pumutok ang bukangliwayway sa aming ulo. Na ang pagtatapos ay natabas sa mga piraso. Ang paa ng aming mga tsikiting ay mabilis na pumihit tungo sa himpapawid. Isinantabi ng oras ang sarili at ipinikit ng mga pook ang kanilang mata, na parang musmos na nagsasabing abuhin ang nasa likod ng kanyang talukap. Ang mga kisame'y nagbagsakang talon ng batuhan, at sa ilalim ng mga batong durog natagpuan ang huling larawang nakasabit: isang huling pintang naukit sa ating mga mukha. Mag-isa tayong tatanda ngayong gabi, maghahabi ng mga oras at susuutin ito, lalamunin ng lagim na tumatakbong pababa sa bibig ng ating tsikiting. Sino ang lalapa sa ating kinalawang na labi?  — sa Gaza 10.10.2024 Pinaghalawan ng tula at larawan mula sa kawing na:  https://thebaffler.com/from-palestine/dawn-hussin   Proyektong pagsasalin na balak ilunsad bilang aklat sa Nobyembre 29, 2024, International D

NAKBA Tula ni Sheikha Hlewa Isinalin sa Ingles ni Fady Joudah (Malayang salin ni Gregorio V. Bituin Jr.) Mas bata ng tatlong taon ang aking ina kaysa Nakba. Subalit hindi siya naniniwala  sa mga dambuhalang kapangyarihan. Dalawang beses bawat araw ibinabagsak niya ang Diyos sa kanyang trono pagkatapos ay makikipagkasundo sa kanya sa pamamagitan ng pagninilay sa pinakamahusay na mga naitalang salaysay mula sa Quran. At hindi niya kayang tiisin ang mga kiming babae. Ni minsan ay hindi niya binanggit ang Nakba. Kung ang Nakba ay kanyang kapitbahay, harapang sisigawan siya ng aking ina: "Nasusuka ako sa baro sa aking likod." At kung ang Nakba ay naging kanyang ate, baka paglaanan siya ng tinapay,  subalit pag talagang umangal ang kanyang kapatid  na babae, sasabihin sa kanya ng nanay ko:  “Tama na. Binabarena mo ang utak ko. Marahil huwag muna tayong dadalaw kahit sandali?" At kung ang Nakba ay naging matandang kaibigan, matitiis ng nanay ko ang kanyang katangahan hanggang s

UNANG KRIMINAL, AYON SA PALAISIPAN turo mula sa Genesis noong ako'y bata pa pinatay ni Cain si Abel na kapatid niya kaya nang sa palaisipan tinanong talaga Lima Pababa: Unang kriminal, si Cain pala Adan ang sagot, Pito Pababa: Unang lalaki si Adan na kumain ng mansanas na sinabi ni Eva, at si Cain na pangunahing salbahe binahaging kaalaman ng krosword na'y kayrami tunay ngang may kabuluhan bawat palaisipan sapagkat hinahasa nito ang ating isipan pinasisilip nito'y samutsaring kaalaman iba't ibang paksa, mayorya'y talasalitaan sa umaga madalas bibilhin ko na'y diyaryo dahil sa balita at sumagot ng krosword dito pinakapahinga ko na matapos magtrabaho o galing rali o may pinagnilayang totoo - gregoriovbituinjr. 10.09.2024 * krosword mula sa pahayagang Abante, 10.07.2024, p.10

KUNG PAANO KO PINASLANG ANG MGA SUNDALO Tula ni Ahlam Bsharat Isinalin sa Ingles ni Fady Joudah (Malayang salin ni Gregorio V. Bituin Jr.) Mga sundalong kolonyal, ano bang pinaggagawa nila sa aking mga tula sa nagdaang mga taon gayong madali ko silang paslangin sa aking mga tula tulad ng pagpaslang nila sa pamilya ko labas sa tula? Tula ang aking pagkakataon upang ipantay ang iskor sa mga salarin, subalit hinayaan ko silang tumanda sa labas, at gusto kong mabatid nila ang pagkabulok ng buhay nila't mukha nilang kumulubot, mawala ang kanilang mga ngiti, at isalong ang kanilang mga armas. Kaya kung ikaw, mahal kong mambabasa,  ay makakita ng isang sundalong namamasyal sa aking tula, magtiwalang hinayaan ko na siya sa kanyang kapalaran habang iniiwan ko ang isang kriminal sa kanyang natitira pang mga taon, siya'y papaslangin nila. At papaslangin siya ng kanyang mga tainga habang nakikinig siya sa pagbigkas ko ng aking tula sa mga pamilyang nagdadalamhati, hindi siya basta makakaal

ANG MANUNULAT NG MGA ARTIKULO SA PAHAYAGAN  HABANG NAGLAHO NA ANG MGA PUNO'T WALANG NAKIKINIG Tula ni Dalia Taha Isinalin sa Ingles ni Lena Tuffaha (Malayang salin ni Gregorio V. Bituin Jr.) Sa loob ng ilang araw lumuha si lolo. Sa huli inamin niyang nag-iisa na siya, na animo'y wala siyang pitong anak na lalaki na nagbigay sa kanya ng dalawampu't limang apo. Ang aking lolang nasa tahanan, isang tiklis ng igos ang sa pagitan ng kanyang mga paa, ay nananaginip habang maingat na nagbabalat at pinapakain sila sa lolo kong para niyang anak. Ito ngayon ang anyo ng kanilang halikan:  ang mga daliri ni lola ay nasa labi ni lolo. Sa kanilang paligid, ang lahat ay alaala ng pagkalimot. Walang alikabok sa tahanang ito natatakpan ng kanilang kalamnan ang lahat kahit ang mga unan. Tinigilan na nilang matulog sa tahanan ng iba. Sila'y mga nananahan sa kanilang sariling katawan  at ang kanilang tahanan ay gumuho sa ibabaw nila habang ang kanilang  kalamnan ay tumubo sa kanilang kalam

MANGINGISDA NA NAWALA O MANGINGISDANG NAWALA? NATAGPUAN NA BUHAY O NATAGPUANG BUHAY? para bang kompyuter o kaya'y google ang nagsalin kaya di mahusay ang gramatika pag suriin parang di Pinoy kundi barok yaong tagasalin sa aking puna, hingi ko'y pasensya, paumanhin "mangingisda na nawala"  ang sabi sa balita mukhang artificial inteligence ang nagsalita kung totoong Pinoy, tiyak  "mangingisdang nawala" o kaya sasabihin ay  "nawalang mangingisda" "natagpuan na buhay"  o  "natagpuang buhay"  ba? dalawang pariralang di na-edit, di nakita? ang ganito'y sinalin ng google o A.I., di ba? parang Kastilaloy o barok pag ating binasa halatang pinasalin lang sa kompyuter ang Ingles ngunit di pa kabisado ng  A.I.  kaya mintis kumbaga salita sa salita, di pa makinis ang pangungusap, kahit teknolohiya'y kaybilis kaya masasabi mong bano pa rin iyang A.I. na sa balarilang Filipino'y di pa mahusay ngunit hintay, sa ating pagpuna'y m

APAT NA AKLAT SA UNANG LINGGO NG OKTUBRE Maikling sanaysay at tula ni Gregorio V. Bituin Jr. Sa unang linggo pa lang ngayong Oktubre 2024 ay nagkaroon na agad ako ng apat na aklat, mga collector's item at pandagdag sa aking aklatan. Tatlo rito ang pampanitikan at isang pang-ideyolohiya. Oktubre 2.  Ang una'y handog ni misis sa akin upang mas mapaunlad ko pa ang aking pagsusulat. Iniregalo niya sa aking kaarawan ang aklat na  On Writing ng batikang manunulat na si Stephen King . Una kong nabasa si Stephen King dalawang dekada na ang nakararaan - sa kanyang nobelang  Pet Sematari . Maganda ang paglalarawan, kaya ninais ko ring maging kwentista balang araw, at ngayon nga ay nagsusulat ako ng maikling kwento sa pahayagang Taliba ng Maralita. Oktubre 4.  Ang ikalawa at ikatlong aklat ay mula sa dinaluhan kong  General Assembly ng Green Convergence sa Environmental Science Institute (ESI) ng Miriam College . Habang nagbobotohan para sa apat na kataong dagdag sa pito kataong Executive

KAMAY NG DIGMAAN Tula ni Hosam Maarouf Isinalin sa Ingles ni Fady Joudah (Malayang salin ni Gregorio V. Bituin Jr.) Tangan natin ang kamay ng digmaan, hindi upang humakbang iyon kasama natin, subalit iyon ang kamatayan, bagamat makupad, inaakit natin ito. Tangan natin ang kamay ng digmaan, kumbinsidong ito na ang huling panahong kumakaway sa atin ang malaking kapahamakan lalo't walang saysay na dingding ang lansangan, at hinahagilap ng bansa ang isang litrato ng kolektibong kalungkutan. 10.06.2024 Pinaghalawan ng tula at larawan mula sa kawing na:  https://thebaffler.com/from-palestine/hand-of-war-maarouf Proyektong pagsasalin na balak ilunsad bilang aklat sa Nobyembre 29, 2024, International Day of Solidarity with the Palestinian People

SA PAGLULUNSAD NG LIBRONG "PAUWI SA WALA" NI JIM LIBIRAN Maikling sanaysay at tula ni Gregorio V. Bituin Jr. Alauna ng hapon ng Oktubre 5, 2024, Sabado naroon na ako sa sinehan sa Gateway sa Cubao, Lungsod Quezon, upang manood ng  Breaking the Cycle  na handog ng  Active Vista Human Rights Festival . Ang pelikula'y hinggil sa halalan at pulitika sa Thailand. Matapos ang panonood ng pelikula ay may question and answer portion pa. Habang naroon ako'y nakita ko sa fb page ng  Linangan sa Imahen, Retorika at Anyo (LIRA)  na book launching ng aklat ng isang kamakata, ikaanim ng gabi. Doon ay nagpasya akong puntahan iyon. Isang oras pa bago ko madaluhan ang nasabing paglulunsad ng aklat. Pasado ikalima ng hapon nang umalis na ako sa Gateway. Ikaanim ng gabi, naroon na ako sa book launching ng librong  Pauwi sa Wala, Paglalakad mula 1984 hanggang 2024, Mga Tula ni Jim Libiran at Mga Guhit ni Pinggot Zulueta.  Umaabot ng 136 pahina. Nakipag-selfie na rin sa awtor. Naganap iyo

TANGINA SA MAPANLINLANG N'YONG LEKTURA, NAMAMATAY NA ANG AMING MAMAMAYAN Tula ni Noor Hindi (Salin ng tulang Palestino) (Malayang salin ni Gregorio V. Bituin Jr.) Nagsusulat hinggil sa mga bulaklak ang mga kolonyador. Kinukwento ko sa inyo ang tungkol sa mga batang nambabato ng mga tangke ng Israel ilang segundo bago sila maging kampupot. Nais kong maging katulad ng mga makatang nagmamalasakit sa buwan. Hindi nakikita ng mga Palestino ang buwan mula sa mga selda ng piitan at mga bilangguan. Ay, napakaganda ng buwan. Napakaganda nila, ang mga bulaklak. Pumipitas ako ng mga bulaklak alay sa namatay kong ama pag ako'y nalulungkot. Buong araw siyang nanonood ng Al Jazeera. Sana'y tigilan na ni Jessica ang pagte-text sa akin ng Maligayang Ramadan. Alam kong Amerikano ako dahil pag ako'y pumasok sa isang silid, may namamatay. Ang talinghaga hinggil sa kamatayan para sa mga makatang naninilay na naiingayan ang mga multo. Pag ako'y namatay, ipinangangako kong dadalawin kita

ANG PUNO NG CAROB Tula ni Tariq Alarabi Isinalin sa Ingles ni Fady Joudah (Malayang salin ni Gregorio V. Bituin Jr.) Nais kitang kausapin. Kaytagal na  noong may kumausap sa akin, walang sinuman sa paligid nang sinabi sa akin ang mga bagay na sinasabi ko sa iyo habang ako'y naglalakad ng tulog. Halimbawa, kahapon ng 3n.u. ay nagpaulan ang mga sundalo ng mga bombang tirgas, sampung manggagawa ang nagsisiksikan sa isang walk-in refrigerator  para sa mga produkto. At ang gas, parang krudong tumapon sa dagat, isang sunog sa gubat ang pumailanlang sa ere. Nabunot ang puno ng carob. Hindi ko pa alam kung anong kagaya mo pag nilagnat ka. Mura ang kamatis ngayong panahon at malungkot ang mga magsasaka. Tinipon ko ang mga magagandang kamatis para sa iyo. Sa mga bagay na ginagawa ko pagkagising Sinusuri ko ang panahon. Kayrami ng mga entusyastiko ng klima sa Palestine,  tulad ng mga tagasunod ng mga produkto  ng kutis sa Instagram. At isa pa, bagamat dito'y wala ka pa: nais mo ba ng talo