Tula sa sipnayan: Si Archimedes, ang sipnayanon

Tula sa sipnayan
SI ARCHIMEDES, ANG SIPNAYANON

"Bunying Archimedes, / tuklasin mo kaya, 
Kung korona'y gintong / lantay, purong gawa..."
Nag-utos ay hari, / "... o huwad bang sadya?
At si Archimedes, / animo'y nabigla.

Habang nag-iisip, / sa banyo nagtungo.
Kaybanas, naghubad / siya't maliligo.
Lulutasin iyon, / siya'y di susuko
Upang di mawala / ang respeto't luho.

Sa may paliguan, / naglublob, nagbanlaw;
Umapaw ang tubig, / dama ang paggalaw!
Aba'y bigla na lang / solusyo'y lumitaw,
Ang kanyang nasuri / sa diwa’y natanaw.

Sigaw ay "Eureka!" / (Natuklasan ko na!)
Sa labis na tuwa'y / tumakbo sa kalsada;
Kahit hubo't hubad / ay walang paki na,
Dahil nalutas din / ang kanyang problema.

Ang natapong tubig / doon sa batalan
Ay katumbas niyong / lubog ng katawan
Bigat ng korona / nang sinukat naman
Ay di purong ginto, / kanyang natuklasan.

Ay, si Archimedes / ay di rin kinapos.
Talagang kaygaling, / henyo siyang lubos.
Si Haring Hieron / doon sa Syracuse
Ang kay Archimedes / ay pumuring taos.

- gregoriovbituinjr.
10.11.2026

* litrato mula sa google

Mga Komento

Mga sikat na post sa blog na ito

Ang wastong gamit ng gitling sa panlaping ika

Kung walang sagot, mali ba ang tanong?

Ang kahalagahan ng tuldik